Kumpulan #PantunMinang Edisi “Cinto Jauah di Mato”

#PantunMinang hadir di timeline dunsanak tiok rabu malam mulai jam 10 malam

Salamaik malam dunsanak! malam kini kito basobok baliak dalam acara #PantunMinang
Sabalun masuak tema #PantunMinang, ambo nio maingek an tentang aturan #PantunMinang, disimak:
1. wajib pakai hestek #PantunMinang
2. Pantun indak buliah manganduang unsur pornografi dan SARA
3. diharok an kapado dunsanak, bapantun jan supayo di-RT. Bueklan pantun sa kreatif mungkin. okey?

Untuak malam kini ( 8 Januari 2013) #PantunMinang nyo diagiah tema “Cinto Jauah di Mato”

1. Daripado angkuik jo oto | ancak tulak nan jo garobak | Dek cinto jauah di mato | Makan ndak kanyang, lalok tak lamak – @infoSumbar
2. anak ketek nan banamo si anto | pai ka kota naiak oto | sajak cinto jauah di mato | ndak mungkin lai untuak basuo – @82Davit
3. oi tumbuahlah sirumpuik banto | ditanam di dakek batang kamumu | dek cinto jauah di mato | dalam rasian kito batamu – @rafihamd
4. Kijok manih bulu mato | kaniang luweh mode karo | Kok Cinto Jauah di Mato | tagesoh sagetek jadi mambaro. – @MrAnantaa
5. ka sawahlunto mambali soto | soto lah abih baganti jo madu | kok cinto jauah dimato | gulo manih taraso ampadu – @Anne_Suija
6. Nan ba masak si gulai kalio | nasi ditanak di ateh dandang | Sajak adiak jauah di mato | mato den lalok hati batanggang – @the_echos
7. tijak-tijak baok bajalan | jauah bajalan ka tanah banto | dek adiak jauah di sinan | adiak manangih uda taseso – @costan_rider
8. Buek rumah paralu lahan | lahan dibali dikoto baru | daripado kasiah bajauahan | ancak denai cari nan baru – @Vegi_30
9. Ungguak jarami di tangah ladang | diurak anak kampuang subarang | Dalam rami den tamanuang surang | takana adiak di rantau urang – @the_echos
10. Lewat oto mambaok barang | di pom bensin ma isi minyak | takana adiak di rantau urang | makan tak enak tidur tak nyenyak – @IhsanArrab
11. Bali kacang ka limpato | kacang dimakan sapanjang jalan | sajak adiak jauah dimato | barek hari taraso dijalankan – @at_agung
12. sanang bajalan di jalan taduah, aia tasauak di tanah lapai, kalau cinto lah ka jauah, hati taramuak aia mato badarai – @costan_rider
13. siang-siang mancaliak oto ceper | siap tu bocor bannyo | tiok sabanta denai mancaliak kalender | ntah kabilo uda katibo – @lengga_pradipta
14. Pai ka pasa bali surabi | bali duo pitih saribu | Sabara bana jauahnyo uda kini | lai juo kan adiak tunggu – @zzellano
15. anak kuciang babalang tigo | nyo sipak dek urang gilo | alah adiak jauah di mato | dalam mimpi ndak tibo pulo – @CaaLMayda
16. Alah rapi rasonyo badan | Mari kito pai bamain | Walaupun jauah adiak di Medan | Ndak ka taganti dek nan lain – @dckydhnt
17. bacarito mamak jo kamanakan | tantang nagari desa subarang | nasi sasuok indak tamakan | takana adiak di nagari urang – @josedjv
18. Alah marantak si anak kudo | garobak baban ba isi sayua | dek badan nan tak bapunyo | Cinto tapisah di taluak bayua – @the_echos
19. anak amak ado baduo | yang sorang putiah yang sorang kaliang | takana adiak nan jauah dimato | coklat dimakan taraso cik kambiang – @AdrianFumi
20. nan lapang yo tanah andaleh | razaki yo tanah ameh | jiko surek uda ndak tabaleh | hati gundah harok2 cameh – @costan_rider
21. Sarikayo dimakan basamo-samo | dimakanyo katiko dihulu | Ikolah nasib cinto jauah dimato | uda sakik adiak sampai dak tau – @masdianto17
22. Andi lau pai ka Lintau | Tibo dsinan bali palampuang | Manggalau badan di rantau | Taingek adiak nan di kampuang – @ElSyukri92
23. anak gadih duduak di surau | rancak muko rancak hatinyo | cinto kito basubarang pulau | lauik nan jadi pambateh nyo – @hendrisajaa
24. Dapek kambiang untuak didabiah | kaguno di rayo kurban | Cinto tido sayangpun baraliah | samanjak kito bakajauhan – @Chiarancakbana
25. kalam hari di waktu sanjo | buruang lah tambang kasarang nyo | takana adiak nan jauah di mato | uda tamanuang jo hati nan taibo – @deswialdy
26. rancak pohonnyo si kayu jati | tanamo nan dari dahulunyo | Jauah di mato dakek hati | yakin jo cinto untuak salomonyo. – @IniRickRick
27. Ramuak raso hati den kini | dek ulah cinto jauah dimato | Disiko denai manjago diri | di sinan adiak mambagi cinto – @hendrisajaa
28. anak sipasan makan karak | talatak dalam paluang | dituruik jauah ndak dituruik taragak | ambiak banta bae manggaruang – @eQ_abai
29. urang mudiak raun ka padang | urang darek baburu ka rimbo | mambidiak cinto jauah di subarang | cincin tapasan undangan tibo – @dittopradipta
30. Pai baralek ka pandai sikek | kiroe basobok jo kawan lamo | kalau hati alah tapikek | uda jauah den tunggu juo – @lee_amely
31. dek ulah jauah bajalan | nan batih jadi tambah gadang | dek ulah cinto bajauahan | sado janji dihampeh galombang – @infoSumbar
32. Kambiang mimin pandai baranang | kambiangnyo batino | baa lo hatiko ka sanang | uda di balimbiang adiak di cino – @HaggyChocholate
33. Pai bajalan ka bukik karang | tasangkuik kaki deg ulah batu | walau uda kini di rantau urang | adiak nanti juo dmuko pintu – @NiisiivaniiLMA
34. Anak kuciang mamanjek dahan | tasialia jatuah tatilantang | laki bini bajauhan | gaji abih pambali tiket kapa tabang – @velly_velia
35. Lain banda lain tapian | tapian kami babatang mangga | rusuah rasonyo badan kini bajauahan | satiok hujan hanyo adiak nan takana – @the_echos
36. buah sampelo, buah durian | limau manih, limau puruik | kok cinto sadang bajauahan | kalau taragak ntah kama ka dituruik – @infoSumbar
37. hari hujan aia ditampuang | diangkek pakai panggalan | dek ulah adiak jauah di kampuang | uda acok di atok mangecek jo bulan – @CaaLMayda
38. ado sarok ado langau | makan gulai campua pangek | samanjak uda di rantau | acok bana adiak minum paramek – @Niacamay
39. pai mandi ka garagahan | nampak urang manjalo ikan | dek cinto kito bakajauahan | lah kram ampu uda mangirim pasan – @NanangSarfinal
40. malayok si buruang alang | malang tasangkuik di ateh suluah | sauleh doa sasudah sumbayang | paubek rindu kasiah nan jauah – @infoSumbar