Kumpulan #PantunMinang Edisi “Alaik Musik Tradisional Minang”

#PantunMinang hadir di timeline dunsanak tiok rabu malam mulai jam 10 malam

Salamaik malam dunsanak! malam kini kito basobok baliak dalam acara #PantunMinang
Sabalun masuak tema #PantunMinang, ambo nio maingek an tentang aturan #PantunMinang, disimak:
1. wajib pakai hestek #PantunMinang
2. Pantun indak buliah manganduang unsur pornografi dan SARA
3. diharok an kapado dunsanak, bapantun jan supayo di-RT. Bueklan pantun sa kreatif mungkin. okey?

Untuak malam kini ( 23 Januari 2013) #PantunMinang nyo diagiah tema “Alaik Musik Tradisional Minang”

1. barabab urang di piaman | basaluang urang di bukik tinggi | tagalau denai samalaman | mangana untuang si badan diri – @infoSumbar
2. kok tambua lah di tabuah | kok talempong lah di tokok | kok cinto alah tumbuah | tingga baleh nan diharok – @infoSumbar
3. bagitar yo bana fasiah | barabab ba ako cangguang | baulah yo nan takasiah | basabab mandanga asuang – @setyawanws
4. rancak buninyo sipupuik padi| mainan anak koto gadang| bacakak rasonyo didalam hati| mangana adiek lah punyo urang – @arghi_holmes
5. baralek di malam rabu | hiburannyo barabab sambia bakaba | kok amak cari minantu | cari yang sakunyo taba – @infoSumbar
6. Kok lah abih padi disalin | marilah kito bamain saluang | kok adiak masih samo urang lain | yo sabana manyasak jantuang – @taufikengineer
7. baralek yo nak hari sabtu | tukang talempong sewanyo minggu | jiko etek nak bananantu | co tanyo mimin @infoSumbar lu – @setyawanws
8. tokok alu jo daun pandan | anggan mahambuih pupuik btang padi jikok baitu nasib mandan | jan sagan cari ganti – @setyawanws
9. main bansi ditangah malam | basaluang urang di ampek angkek | bialah denai bakulik kalam | yang penting bini ampek – @infoSumbar
10. rabab pasisia iko namonyo | didendangkan urang nagari tiku | bialah rambuik samo hitamnyo | isi kapalo sia yang tau @utarielsangri
11. barabab urang Piaman | babansi diari sanjo | lah malu dek olok kawan | gini hari masih jomblo – @damnoise
12. Sabana sanang mandanga saluang | Apo lai ditambh jo gandang | Sambia duduak tamanuang-manuang | Dek ta ingek adiak nan di kampuang – @geostevan
13. Kok bajalan ka tanjuang pati | singgah sabanta di sungai tarab | Jikok adiak baibo hati | marilah kito bamain rabab – @hendrisajaa
14. Sabana sero main talempong | mairingan lagu roda padati | andai kato adiak masih kosong | izinkan uda untuak maisi – @taufikengineer
15. Saluang babunyi kironyo baradu | dimainkan anak urang limo koto | Ramuak hati manahan rindu | takana uda nan jauah di mato – @yessicave
16. Badarai bunyinyo si pupuik bansi | mambangkik lukah ditangah badai | Marasai badan dek calon bini | alun manikah lah bacarai – @Chaililul
17. Barabab urang biaro | rababnyo dari sialang | baa sabab hati ndak ka ibo |
    tacinto gadih punyo urang – @KabaSumbar
18. Main rabab di sungai limau | main talempong di tanah jao | kalau anak iduik di rantau | Pitaruah mandeh jan dilupo – @indahps_07
19. Sabana lasuah bunyi pupuik sarunai | dimainan dihari malam | Sabana pandai adiak manyewai | sampai luluah kadalam-dalam – @BangBoco
20. Saluang babunyi kironyo baradu | dimainkan anak urg limo koto | Ramuak hati manahan rindu | takana uda nan jauah di mato – @PutriMauliyati
21. wak main gandang | nyo main talempong | Kapalo wak sakik dek talangkang | nyo pupuah galak gadang – @IkhsaanRamadhan
22. bali bansi di pasa raba’a | Baolah pulang sambia balari | Alah duo hari uda ndak ado kaba | Antah kama ka denai cari – @kajjul
23. talempong ditokok piriang didantiang | tando bapesta urang di mudiak | uda rela di sabuik maliang | asa lai tacilok hati adiak – @CaaLmayda
24. Batanam padi disawah | bamain pupuik sirunai | baiman ka Tuhan Allah | bia iduik jd damai – @infoLintau
25. panjang saiknyo rabab piaman | lain pulo sigonyuiknyo | kok lah digulai daun tapak leman | ondeh dapek raso sarugo – @OlidPanuli
26. Maambuih pupuik sarunai | Pupuik diambuih urang sabaliak | Takana wakatu adiak malambai-lambai | Sablun uda pai kapulau sabaliak – @geostevan
27. Talempong nyariang suaronyo | bunyi saluang panghibur diri | iduik di dunia awak dihino | dek ulah bangsek pamenan diri – @hendrisajaa
28. Urang basaluang tangah malam | saluang Jo rabab sarato dendang | malam ko denai mandamam | mandanga uda manyuntiang urang – @imahfahmi
29. Lah manangih mande di laman | mangana anak yang ndak kunjuang pulang | marilah sanak kito dangakan | bunyi saluang jo salawat dulang – @hendrisajaa
30. Tadanga bunyi saluang di tangah hari | Sarato bunyi gandang | Lah lamo adiak mahituang hari | Bilo masonyo uda ka pulang – @eli_arkarna